شرح مكونات العفشة - وظيفة كل جزء

(((  العفشه ))) بتقسم لأربع اقسام رئيسيه

هى كل جزء فى السياره مسئول عن

(( 1  حمل وزن السياره ))  

و 

(( 2 تحريك السياره ))

و 

(( 3 توجيه حركتها ))

و 

(( 4 ايقافها ))

دا كان التعريف الجامع للعفشه

ودلوقتى هنشرح كل جزء بالتفصيل:

1 ((  حمل وزن السياره  ))

أجزاء العفشه المسئوله عن حمل وزن السياره هى

1 ( المساعدين )

والمساعد يتكون من ( ياى او سوستة المساعد وقلب المساعد والبطاحه)

2 ( الجنوط )

والجنوط بتكون حديد او جنوط اسبور مصنوعه من سبايك من مواد صلبه وخفيفه

3 ( الشمعدان )

وهو الجزء الواصل ما بين المساعد ووجه العجلات

4 ( القنطره )

ودى فى بعض السيارات بتكون شايله ومجمعه اجزاء العفشه الأماميه مع بعض

5 ( شدادات الشاسيه )

ودى بتبقى نوعين على حسب مكان تواجدها

علويه وسفليه

موجوده استاندرد فى بعض السيارات ذات الأداء الرياضى

وطبعا متاحه كتعديل لباقى السيارات ولها شركات تعديل خاصه لأنتاجها

وظيفتها تقوية أداء الشاسيه وزيادة اتزان السياره وتقوية العفشه

2  ((  تحريك السياره  ))

اجزاء العفشه المسئوله عن تحريك السياره هى

1 ( الفتيس )

وهو قلب الحركه والمسئول عن تحويل طاقة الموتور الى حركه وسرعه على العجلات

وينقسم الى نوعين:

1 فتيس مانيوال

وهو ابسط فى الصيانه واسهل فى التعامل واوفرفى الأستهلاك واطول فى العمر 

ولكن

يحتاج مجهود عضلى اكبر

ويتكون الفتيس المانيوال من قلب الفتيس الذى يحتوى على مجموعة التروس والنقلات

و

الأسطوانه والديسك والفرش وبلية الدبرياج وهى المجموعه المسئوله عن وصل وفصل الحركه مابين الفتيس والموتور ( ترس الفولام )

2 فتيس اوتوماتيك

وهو اصعب فى صيانته واعقد فى التعامل معه واكثر استهلاكا للبنزين واقصر فى العمر الأفتراضى

ولكن اوفر فى المجهود العضلى

ويوجد منه انواع كثيره جدا ( اوتو عادى و CVT و DSG و استبترونك و ايزى ترونك و مالتى ترونك )

ويتكون الفتيس الأوتو من قلب الفتيس ويحتوى على تروس النقلات و التورك كونفرتر والفالف بودى والسنولوليد والفلتر وعقل الفتيس وقربة زيت الفتيس

2 ( الكبالن ( فى سيارات الجر الأمامى ))

وهى الجزء المسئول عن نقل الحركه من الفتيس الى العجلات الأماميه وهى تتكون من رأسى كوبلن داخلى وخارجى متحركين فى كل المحاور وزراع كوبلن يتحرك دائريا فقط

3 ( الدفرنسيل وعمود الكردان ( فى سيارات الدفع الخلفى ))

وهم الجزئين المسئولين عن نقل الحركه من الفتيس الى العجلات الخلفيه

4 ( وجه العجلات )

وفيهم بلى العجلات وهم الجزء الذى يربط عليه طنابير الفرامل وعجلات السياره

3  (( توجيه اسياره  ))

والأجزاء المسئوله عن توجيه السياره من العفشه هى

1 ( الدركسيون )

2 ( صليبة الدركسيون ) 

( وظيفتها نقل الحركه من الدركسيون الى الأسكترا )

3 ( الأسكترا ) 

( وتكون غالبا مربوطه فى صدر العربيه وهى مسئوله عن تحريك السياره الى اليمين واليسار )

ومنها نوعين:

1 ( اسكترا عاده ) 

وهذا النوع بيكون ثقيل الحركه ويحتاج مجهود عضلى من قائد السياره

2 ( اسكترا باور ) 

ودى بتنقسم لنوعين

1 ( باور زيت ) ودى بتستمد قوتها من طرمبة باور تعمل على ضغط الزيت وبتكون متصله بالموتور

2 ( باور كهرباء ) ودى بتستمد قوتها من موتور كهربائى متصل بالأسكترا نفسها

والأسكترا فى الغالب بتتكون من جسم الأسكترا و2 تيش و2 بيض تيش او بيض طرف

4 ( المقصات )

ودى المسئوله عن توجيه حركة السياره نزولا وصعودا 

وبتتكون فى اغلب السيارات من جسم المقص وجلبتين وبيضة مقص

4  (( ايقاف السياره ))

منظومة الفرامل فى العفشه هى المسئوله عن ايقاف السياره

وبالرغم من اختلاف قدرتها واشكالها الا انها بتتكون فى الغالب من

1 ( بدالة الفرامل )

2 ( السيرفو ) 

وده الجزء الأسود المدور اللى شبه الطبله اللى دايما بيكون مربوط فى صدر العربيه من جوه الغرفه

وظيفتها مضاعفة قوة ضغط رجلك على بدالة الفرامل

بتستمد قوتها عن طريق خرطوم مذود بصمام متصل ب فاكيوم مجمع السحب ( المانيفولد )

3 ( الماستر العمومى ) 

وده المسئول عن ضغط زيت الباكم للمساتر الفرعيه لتحقيق الفرمله

وبيكون ملتصق بالسيرفو مباشرة

4 ( قربة زيت الباكم ) 

ودى بتبقى راكبه فوق الماستر العلوى 

وهى تعتبر خزان زيت الباكم او زيت الفرامل

5 ( خراطيم الباكم ) 

ودى بتوصل زيت الباكم ما بين الماستر العمومى والمساتر الفرعيه عند العجلات

6 ( المساتر الفرعيه ) 

ودى بتبقى راكبه على الأربع اجناب بتوع العجل ووظيفتها ضغط تيل الفرامل على ديسكات الفرامل عن طريق القوه الآتيه اليها من الماستر العمومى عبر خراطيم الباكم

7 ( جشم الفرامل او الكاليبرات ) 

ودى تعتبر الجسم الحاضن للتيل وبتتكون من جزئين معدن ثابت ومتحرك والبستم الفرعى او بستم فرامل العجل

8  ( الطنابير او الديسكات ) 

ودى بتكون متصله مباشرة بالأكس المتحرك للعجل

9 ( تيل الفرامل )

وده عباره عن نهاية مطاف منظومة الفرمله حيث انه الأداه اللتى تضغط على الطنابير لتحقيق التوقف الكامل للسياره ككل

10 ( اجهزة ABS , EBD , BA , ASR , TCS ) 

وهى عباره عن انظمه الكترونيه مساعده لمنظومة الفرامل لتحقيق اكبر قوه فرمليه آمنه

شرح مكونات العفشة - وظيفة كل جزء